បន្ទាប់​ពី​មាន​បញ្ហា​ប៉ុន្មាន​ថ្ងៃ​មក​នេះ​ជាមួយ​នឹង​ Macbook Pro 2018 ដែល​បំពាក់ CPU Intel Core i9 ឡើ​ង​កម្តៅ​រហូតដល់​ម៉ាស៊ីន​ដំណើរ​ការ​យឺតជាង​ធម្មតា​រួច​មក ថ្ងៃ​នេះ​ក្រុម​ហ៊ុន​ Apple បាន​ចេញ​សារ​សុំ​អភ័យ​ទោស និង​ចេញកំណែ Update Firmware ថ្មីដែល​មាន​ឈ្មោះថា macOS High Sierra 10.13.6 Supplemental Update សម្រាប់​ធ្វើ​ឲ្យ​ម៉ាស៊ីន​ដំណើរ​ការ​បាន​គ្រាន់បើ​ជាង​មុន​ និង​មិន​សូវ​ឡើង​កំដៅ។

ក្រុម​ហ៊ុន​ Apple ក៏​បាន​បញ្ជាក់​ដែរ​ថា​បញ្ហា​នេះ​គឺ​ជា​ Bug នៅ​ក្នុង​ Software​ ទោះ​បី​ជា​គេ​ជឿ​ថា​មក​ពី​ការ​រចនា​រាង​ស្តើង​របស់​វា​ដែល​ធ្វើ​ឲ្យ​ម៉ាស៊ីន​ក្តៅ​ក៏ដោយ។

បើ​តាម​សម្តី​នាំពាក្យ​ពី​ MacRumours ក្រុមហ៊ុន​ Apple បាន​និយាយ​ថា៖

” បន្ទាប់​ពី​ធ្វើ​តេស្ត​ជា​ច្រើន​ដង​រួច​មក ពួក​យើង​បាន​រក​ឃើញ​បញ្ហា គឺ​វា​បណ្តាល​មក​ពី​បាត់ Digital Key នៅ​ក្នុង Firmware ជាហេតុ​បណ្តាល​ឲ្យ​មាន​បញ្ហា​កើន​កម្តៅ​និង​យឺត។ កំណែ​ Update ថ្មី​នឹង​ត្រូវ​បញ្ចេញ​ថ្ងៃនេះ ដែល​មាន​ឈ្មោះ​ថា macOS High Sierra 10.13.6 Supplemental Update ហើយ​អ្នក​គួរតែ​តម្លើង​កំណែ​ថ្មីនេះ។ ពួក​យើង​ក៏​សូម​អភ័យទោសដល់​អតិថិជន​ទាំង​អស់​ដែល​ជួប​បញ្ហា ហើយ​បន្ទាប់​ពី​តម្លើង​កំណែ​នេះ​រួច ម៉ាស៊ីន Macbook Pro 15′ នឹង​មាន​ល្បឿនលឿន​ជាង​មុន​ 70% ចំណែក​ឯប្រភេទ 13′ ដែល​មាន​ Touch Bar​ អាច​រត់​បាន​លឿន​ជាង​មុនដល់​ទៅ 2 ដង ដូច​ដែល​បាន​បង្ហាញ​នៅលើ​គេហទំព័រ​របស់​យើង​ស្រាប់ (Apple.com) “

អ្នក​ជំនាញ​បាន​បញ្ជាក់​ផង​ដែរ​ថា កំណែ​ថ្មី​នេះ​បាន​ធ្វើ​បញ្ហា​ចុះ​ថយ​ច្រើន​ជាង​មុន ប៉ុន្តែ​មិន​មែន​បាត់ 100% នោះ​ទេ ដោយ​សារ​តែ​វា​ត្រូវ​ការ​សីតុណ្ហភាព​ត្រជាក់​ជាង​នេះ​ដើម្បី​ដំណើរ​បាន​រលូន។

ប៉ុន្តែ​យ៉ាង​ណា​ក៏​ដោយ​ក្រុម​ហ៊ុន Apple បាន​សំុ​ទោស​រួច​រាល់​ហើយ។